Tuti noi goernoma n’arcòrd përfumà dij pòst anté i soma chërsù; col arcòrd che ‘d sòlid a ven definì coma la vision olfativa d’un leu.
A mè Pare, ch’a vivìa a Coindo, na borgà ‘d Condòve (Turin), a-j bastava deurbe l’uss ëd ca për gòde ‘d coj bon përfum ëd la montagna, minca di divers, e avèj l’impression d’un paesagi ch’a compar e a dëspariss, pròpi mersì a cost alternesse ‘d parfum fòra e andrinta ca. Chiel da l’uss a beicava l’alvesse dël Sol, opura l’aria satìa ‘d na nebiëtta fin-a che pian pianòt a s’alvava vers al cel, e a sentìa ‘l tìpich odor ëd la mofa bagnà ‘d rosà.
Chi a viv an montagna a sa che a minca stagion, minca di, minca àtim tut a cambia, ëdcò ij përfum: parfum ëd prima, ‘d boscaja, ‘d fò, ‘d biole, ‘d mofa, ‘d ramaje sla broa dij senté, ‘d mentass, ëd pra quatà ‘d safran e ‘d siclamin. E ‘l particolar odor dij bolé mës-cià a col ëd le feuje ùmide. Ëdcò la tèra a l’ha sò përfum, col ëd la tèra sùita apen-a bagnà da la pieuva. I soma ‘nsì ambibì ‘d përfum e d’odor ch’i soma pì nen bon a arconòssje: i soma tròp ësvantà.
Ant la borgà as respira l’odor ëd le bestie e dël làit pen-a monzù, che peui a ven saventement travajà e trasformà ‘n formagg ò butir. Ëdcò la fiama dël fornel a smija ch’a l’abia sò parfum, e a giuta a ‘rcariesse ‘d fòrsa, pas e armonìa. E d’invern, i l’eve notà col sutil odor ëd la fiòca e dla frèid? Quand ch’as torna a ca, a smija che le veste e le mude as pòrto daré col përfum.
Për mi, l’odor ëd l’erba tajà ‘d fresch, d’un pra fiorì ‘d pentecòste ò l’odor dij bòsch, a m’arcòrda la giovnëssa. Cand i l’artreuvo a l’é sempre na gradìa sorprèisa, e serco ‘d respirene pì ch’i peuss, për gòde a longh ëd l’impression ëd benesse e ‘d gòj. Verament che ij parfum a dan ëd sensassion ch’a cambio pa con ël passé dël temp; sovens un lontan arcòrd a pija l’achit pròpe da na sensassion olfativa.
La montagna, con ij sò parfum a l’é piasosa; a l’é na meusia conquista ‘d benesse e a trasmett un sens total ëd pas e serenità; cand ch’i-j vado im sento lìber e më slontan-o da tut. I son anvërtojà dal silensi, e se peui im fërmo a deurme a-i é nen n’anciarm pì grandios dël vardé, ‘nt lë scur, la vòlta dël cel ò vardé ambajà l’alba dai mila parfum e nuanse ‘d color.
Se as podèissa saré ij parfum ëd la montagna ‘nt una burnìa i lo farìa, e la poserìa lì an sla librarìa, ansema a le veje fòto, le litre, le monede e a j’àutre ròbe ch’a m’arcòrdo ‘l passà. A sarìa n’armedi për ëscapé da la realtà, cand ch’i sento lë bzògn ëd dé ciàir a j’ombre, nostalgìe, regret… ò chi sa còsa.
Gian dij Cordòla
I PROFUMI DELLA MONTAGNA
Tutti noi conserviamo un profumato ricordo dei luoghi dove siamo cresciuti; quel ricordo che solitamente viene definito come visione olfattiva di una località.
A mio Padre, che viveva a Coindo, una borgata di Condove (Torino), bastava aprire l’uscio di casa per godere di quei buoni profumi della montagna, ognuno diverso, e avere l’impressione di un paesaggio che compare e scompare, grazie a questo alternarsi di profumi fuori e dentro casa. Lui dalla porta osservava il sorgere del Sole, oppure l’aria carica di una sottile foschia che piano piano si alzava verso al cielo, e sentiva il tipico odore del muschio bagnato di rugiada.
Chi vive in montagna sa che ad ogni stagione, ogni giorno, ogni momento, tutto cambia, anche i profumi: profumo di primavera, di sottobosco, di faggio, di betulle, di muschio, di ramaglie sui bordi dei sentieri, di menta selvatica, di prati ricoperti di crocus e ciclamini. E il particolare odore dei funghi frammisto a quello delle foglie umide. Anche la terra ha il suo profumo, quello della terra secca appena bagnata dalla pioggia. Siamo così pervasi di profumi e di odori che non riusciamo più a riconoscerli: siamo troppo distratti.
Nella borgata si respira l’odore del bestiame e del latte appena munto, che poi viene sapientemente lavorato e trasformato in formaggio o burro. Anche la fiamma del camino pare abbia il suo profumo, e contribuisce a ricaricarsi di forza, pace e armonia. E d’inverno, avete notato quell’odore sottile della neve e del freddo? Quando si torna a casa, pare che gli abiti si portino appresso quel profumo.
Per me, l’odore d’erba tagliata di fresco, di un prato di narcisi, o l’odore dei boschi, mi ricorda la giovinezza. Quando la ritrovo è sempre una gradita sorpresa, e cerco di respirarne il più possibile, per godere a lungo dell’impressione di benessere e di gioia. È vero che i profumi danno sensazioni che non cambiano con il passare del tempo; sovente un lontano ricordo prende vita da una sensazione olfattiva.
La montagna, con i suoi profumi è piacevole… è lenta conquista di benessere e trasmette un senso totale di pace e serenità; quando ci vado mi sento libero e mi estraneo da tutto. Sono avvolto dal silenzio, e se poi mi fermo a dormire non c’è incanto più grande del guardare, nel buio, la volta del cielo o guardare affascinato l’alba dai mille profumi e sfumature di colore.
Se si potesse racchiudere i profumi della montagna in un barattolo lo farei, e lo poserei sulla libreria, con le vecchie foto, le lettere, le monete e le altre cose che mi ricordano il passato. Sarebbe un rimedio per evadere dalla realtà, quando sento il bisogno di dare luce alle ombre, nostalgie, rimpianti… o chissà cosa.
Gianni Cordola
Il giorno 24 maggio 2025 in piazza Martiri della Libertà a Santena (TO) nel corso dei festeggiamenti per la Sagra dell’asparago 2025 con questo racconto ho avuto l’onore di essere premiato come terzo classificato al concorso letterario “Santena in versi” nella sezione narrativa breve in lingua piemontese. Un grazie alla giuria per il riconoscimento dato al mio racconto “Ij përfum ëd la montagna”.
Alcune immagini della premiazione
